名古屋Ironman 70.3， 係我第一個嘅Ironman series，雖然只係接力，但係都超級緊張刺激！
比賽係星期日舉行，我哋星期五晚機出發去名古屋，星期六早上，就開始一連串嘅check-in程序。 (PS：好多人問我係唔係大會會提供單車? 嗯....大會係有推薦嘅單車舖可以俾你租，不過要踩90公里wor，姐係由荃灣>屯門>落馬洲>上水>大埔>沙田>西貢市再去埋科大wor！最好都係帶返一架自己熟悉嘅車點都好d嘅.....^-^")
首先，要去聽簡介會，不得不佩服日本人嘅秩序，每一張櫈，都超級整齊咁排好晒，仲要每一張凳都都係拉線度嘅(え⋯⋯)
我哋聽嘅係英文版簡介會，負責主持嘅司儀係精通各國語言，因為我係台東Ironman做義工時都見過佢，但嗰時嘅佢係講緊普通話！今次佢係講日文同英文！聞說，越南Ironman佢係講越南話(え⋯⋯)，究竟佢識幾多種語言呢？
聽完簡介會，梗係要行Expo!
- Ironman系列嘅比賽，每一次都會將參賽名單做成T-shirt或者大毛巾，當然要搵返自己名啦!
不過Expo唔大，而且冇咩特別靚嘅嘢，所以可以慳返些少旅費，哈哈！
同隊友會合，就走去check-in，呢part係幾混亂嘅，因為大會分開咗外國人同本地人嘅排隊位置，於是我哋排咗幾次隊，先排到一條啱嘅隊最後都終於比我地攞到個選手包，選手包裏面除咗有基本嘅號碼布、貼紙、泳帽等等，今次送咗個防水袋，質地都唔差！
跟住，就到最麻煩嘅環節——bike check-in...... 之所以麻煩，係因為簡介會嘅地方，同bike check-in嘅地方有一段距離，而且係踩唔到過去嘅，所以全世界嘅人都要搭穿梭巴士先可以check-in，等車連搭車都用左一個鐘嘅時間。
- 穿梭巴士等候區
去到T1嘅位置，大會都算仔細咁check每一個參賽者嘅裝備，頭盔要戴上頭check，睇吓係咪適合頭型，車反而望兩望，就可以通過。所有合格嘅車，都會貼上貼紙，證明已經被檢查過。
之後，就要拎晶片，同去返屬於自己號碼嘅單車架上面，放好自己嘅車，咁就算完成bike check-in嘅程序，黎到轉項區，當然要睇埋聽日嘅路線，搞完所有野，再搭車返埋去酒店附近，用咗差唔多四個鐘嘅時間，真係好攰.....
到比賽日，四點鐘已經起身，收拾好行裝，食早餐，就準備出發！點知，上到車先發現唔記得帶太陽眼鏡！十級崩潰！好彩，最後有朋友借幅眼鏡俾我，如果唔係......（準備的重要性！）
去到場地，一開始就要玩定向，因為Relay team收集轉項袋嘅地方，響一個距離起點超級遠嘅位置，好彩俾我哋遇到一個揸地圖嘅工作人員，先搵到呢個位置！不過就算去得到，下一個難題又來啦，究竟我着住對lock鞋周圍行好啊？定係唔着鞋行返起點呢？我冇可能拎住對拖鞋踩90K架，如果交低對拖鞋比水腳，咁我T2着咩返嚟呢？掙扎左一陣，最後都係決定着住對lock鞋周圍走。
- credit to finsherpix
返到起點，hea 咗一陣，就出去睇男子組嘅起步，我哋嘅起步時間相差兩個鐘，佢哋嘅起步係沙灘，於是我就走左落沙灘影相，男子組嘅起步的確好緊張，係側邊睇都feel到佢哋衝出去果下嘅力量！行前d影相影相影相，突然之間feel到隻腳，點解濕濕地嘅？咦！原來我已經踩咗落海水....但係嗰一刻我係着住拖lock嘅......後果係點......唉....唔好提.....
Swim
專心準備接力隊嘅比賽把啦！ 是日嘅水溫係攝氏19.8度，簡單啲來講，即係好凍！我隊嘅水腳得件短袖wetsuit，真係見到佢都凍......一起步，見到都幾大流，所有人嘅平均速度都唔算快，我就專心地係接力區到等水腳上岸，睇住錶， 45分鐘，應該差唔多啦喎，嗯，等我準備吓先，點知等極都未到嘅？大部份隊都已經接晒啦喎，會唔會有咩事呢？ 55分鐘，大會職員同我地講：「如果水腳唔能夠於限時前返到來，你地將會派發一張新嘅晶片，你哋可以繼續比賽！」所以，剩低落嚟嘅人都離開接力區，係游水嘅終點度等派發新晶片，就響佢哋準備登記嘅時候，水腳終於返黎，佢一上水，我已經跑落沙灘，走去接佢嘅晶片，然後即刻跑去拎單車，T1用左4分幾鐘跑出去。
Bike
一上車，希望可以再返多啲時間，第一個圈，好有衝勁咁衝衝衝，一路踩住大餅係咁過人，但係到第二個圈，開始feel到用唔到呢個pacing衝到尾，於是就嘗試跟人嘅速度去踩，好彩都比我搵到一啲目標去跟，有幾段都有啲集團喺度，不過好嘅光景，係唔會長久架！進入第四圈，我嘅目標群，已經轉晒出去最後30K，而我......仍然默默地兜緊圈！
- 最後一圈的光境
最尾一圈， 真係冇乜動力，因為前後都無人，全條路都係我嘅......只好繼續默默地踩，響最後一個回程，終於比我見到一個日本女仔，大家pacing差唔多，全程就不斷前前後後咁互相鼓勵，不過人哋嘅技術好過我，每一次轉彎都比佢過左......
只怪自己冇認真操車……出到最後30K，終於見到啲新嘅風景，感覺舒服啲！呢30K，首先有無盡嘅大海，亦都有無盡嘅木板，雖然比賽之前，見到啲木板係有啲驚，不過踩落又幾濶喎~踩多陣，就會見到無盡嘅田，好似「再見螢火蟲」裏面嘅田，真係好靚，完全忘記自己比緊賽！郊遊mode咗一陣，見到後有追兵，於是又開始繼續努力！上斜slow down、落斜slow down、轉彎slow down、踩兩踩又slow down....聽得最多就係Slow down.....去到最後10K，仲要不斷上落斜，雖然我覺得唔夠鹿頸辛苦，但係呢一刻真心feel到攰，心諗如果仲要跑多個半馬，究竟點跑呀？只好不斷自我催眠：「就到啦， 10K ?即係由長沙灣踩去荃灣咋嘛，好近啫！」途中有個香港女仔同我講奸爸爹，我回應佢一句加油丫，然後大家都笑左眼見越嚟越近，心情就越嚟越輕鬆，去到最後一個U-turn，係興奮嘅！所以……就炒車啦！太心急！未轉好彎就踩腳落去……直炒花槽……跌低咗，在企返起身個一刻，心裏面第一句說話係：「不如推上去啦！」，但係爭個少少唔係唔踩埋去啊？於是我就上返車踩上去，點知我冇為意到，原來啱啱炒個下，係甩咗鏈嘅，所以再零速炒多次，整返好晒之後，我又發覺其實我唔識斜路上車！於是就搬架車去一個闊落啲嘅位置，再次上lock！側邊嘅人見到我搞咗咁耐，到我上到車果一刻，佢哋都不禁拍掌，好滾動丫~~
終於去到T2，見到跑腳，係興奮嘅！落地個一刻竟然跑得到，拎住對lock鞋跑去交棒，一個擁抱之後，就出發，我同其他隊嘅接力腳就返去終點等佢地。
- 常滑市吉祥物~招財貓
終點都有好多配套，有烏冬食，又有得按摩，仲有常滑市、半田市、知多市嘅吉祥物出黎影相，都幾開心嫁！
- 等跑腳途中，按摩先~~
終於俾我地等到啦~~~~
- Finisher T 好靚丫!
- 我地係トライアスロン初心者~
- Ironman70.3 Japan 2017 Finisher Medal
比賽完左之後，仲有Award Party嫁~有野食有野飲~
- 憑手帶入場嘅Award Party
