終於得閒少少做個總結！
一開始報中魚，只係為左下年有機會抽下TNF100，所以Target Sub10，就已經好滿足
報完名之後，再睇下條路線，九成我都行過，心諗冇死啦，不過睇返要做sub 10的話...開始驚啦.... 以我之前嘅紀錄，跑曬成段路都要9.5小時，要連續跑呢50K，10個鐘係做到，但唔容易......不過個個星期六日唔係有比賽，就有野做，少左操山....日子愈來愈近，心情就愈來愈緊張，知道自己狀態不足，就同partner Karmil講郊遊mode好啦，最重要係安全完成！
到比賽日，零晨02:30就醒左，05:30就出門口，天陰陰涼浸浸，我嘅極佳嘅天氣，Yes!一定可以舒舒服服完成！
去到梅窩準備起步，見到好多朋友都一齊起步，不斷吹水，差d連錶都唔記得㩒
起步無幾耐就開始塞人，pacing快唔得去邊，所以心情超郊遊mode，輕輕鬆鬆跑下跑下就去到十塱~
CP1停都冇停就繼續去，然後去到我嘅結界-芝麻灣(因為次次都總有d意外...)，呢個圈其實都幾消磨意志，上落唔算多，但好長，行到一半，突然間愈行愈無力，差d仆左幾次，有次仆左落舊石度，手指磨損即刻流血.......又係芝麻灣....好彩傷口唔深，沖一沖傷口，就抬高傷口繼續跑，跑到CP2就搵First-aid幫手，不過佢地都超忙，first aid站就變左個first aid放題，處理完傷口，簡單補給完之後，就繼續旅程~
跟住嘅路段係由南山橫過伯公坳，全段平平平平平，但仍然係好漫長好漫長好漫長，不過我已經冇力再跑，再加上反反地甲，所以開始慢慢行，吹下水，辛苦Karmil要就住我黎行，去到伯公坳，有個傻佬黎左搵我，第一時間係叫佢幫我做first-aid，然後就好自動波地幫我fill滿所有補給，休息左一陣就出發打大佬
響南山食左包gel + Liquid gel，上大東山就感覺容易好多，慢慢行下行下就上到頂~
真大霧，濕度100%，上到頂，成件褸濕曬，水珠響眼捷毛上面掛住，頭髮就好似arm arm洗完頭咁，滴得出水....
濕度咁高嘅情況下，路都相對比較滑，落山嘅速度大家都比平時慢，呢個時候，機會黎啦，我地飛住落大東，全程差唔多冇收慢過，一直衝到落白芒
白芒，就係最後一個CP，由於仲要打個二佬，所以呢度休息嘅時間相對比較長，不斷食食食，有堅果，有生果，有湯，有汽水，仲有我最鍾意嘅士多啤梨乾！
大約16:00，我地就再出發，加緊腳步希望趕到日落前到終點！
由白芒沿奧運徑去老虎頭，大部份都係上斜嘅路段，上斜從來都係我嘅弱項，所以呢個時候就食多包gel + Liquid gel，諗著可以直衝到尾，點知就出事....胃開始痛，一面抽住一面肴上山，全程都靠對pole撑自己上去，不斷安慰自己：「仲有少少就到，少少ja！」，堅持就是勝利，終於俾我上到老虎頭，wa~~I can do it！
老虎頭落山，相對比較難，冇太多落腳位，好多時都係一d實曬嘅泥路，加上濕度，就好似著Roller落斜咁，當然都有d人可以落得好快，呢段我唔敢去得太盡，始終胃痛緊...... 落到愉景灣嘅水覇，終於見到石屎路！諗著可以直奔終點，點知......要打第三個大佬，剷林......行左43K，體力用左一半，但仲有少少，唔係唔趕快d丫......條路好窄，密林，差錯腳就分分鐘look落山，所以都幾塞人....
穿第二個林嘅時候，睇一睇錶，原來已經18:15！丫~~~~太陽落山啦......為左唔開頭燈，我地用9秒9嘅速度飛落山，Garmin話Best Pace係2:54，我估就係track到呢段(其實我信佢track錯多d...) 又落到石屎路，心諗完啦掛......
仲有神學院嘅大斜路，上上上，見到落樓梯，Wa~~終點在望啦！衝衝衝！
落到銀礦灣，18:41，仲有19分鐘，其實已經無力跑，但唔跑又有機會趕唔到sub 10 wor，就算7分pace都要頂落去，係咁同自己講：「跑埋佢啦，最後1K ja ，你得嫁！」望住終點一路跑跑跑，沿路好多人打氣，真係好感動，終於以9:52分到達終點！Yeah~~~
今次能夠達標完成，要好多謝Karmil同我拍Team，如果唔係佢有去試路，我應該會響第三個大佬度卡住左！沿途仲不斷幫我收pole(我手殘，冇力按粒保險掣)，而且可以10個鐘完成，都係多得佢一路夠郊遊mode，等我唔會chur爆自己!
多謝Jim，行通宵之後都專程走過黎伯公坳等我，可以響路程嘅一半見到你，係一枝好大嘅強心針！
仲要多謝各勞苦功高嘅工作人員同義工，我知好多個都係星期五晚就開始幫手，直踩十幾個鐘！
辛苦曬各位！！！
後記：Translantau 嘅完成牌係用木做，每一個嘅木紋都唔同，每一個都係獨一無二！正正就好似講緊每一個人都係獨特，能完成已經好好，無謂去同其他人比較~
